GALIP

Canta polifonica occitana

Galip es un grop de canta polifonica occitana d'origina Bordalesa. Per partatjar la cultura occitana damb lo monde



Galip es un grop de canta polifonica occitana d'origina Bordalesa.

Prepausicion
Galip es influençat per grops e musicians occitans atau com Gacha Empega, lo Còr de la Plana, la Mal coiffée, Pierre Boissiere, Guillaume Lopez, JF Tisnèr, Artús Cocanha, … e popam autant musicas actualas e monde a las esteticas multiplas. Basada sus la canta polifonica en lenga occitana, la nòsta prepausicion integra percussions e pòt arcuélher instruments au grat de las envèjas, daus encontres. Lo nòste repertòri es en cors d’elaboracion, s’estructura a l’entorn de reprèsas, d'adaptacions e de compausicions. Per çò daus nòstes bocins originaus, desiram renavir tèxtes nòrd gascons en tot los botar en musica, per los balhar a enténder, per los balhar a dançar.

Collaboracions
Lo grop es dubert a las experiéncias collaborativas. Per aquò tribalham damb lo David Escarpit per çò que concernís la valorisacion de la literatura e daus tèxtes girondins / bordalés. Vincent P Gaillard assegura l'apròchi sonòra, audiovisuala e multimèdia que sia pr’aus enregistraments, concèrts o la difusion web. Enfin, nous esperam damb plaser la participacion e tanben contribucions de compositors o adobaires que viran dens l’univèrs occitan. La pòrta es alandada !

Actualitat
Joguèrem l'an passat un purmèir concèrt dens lo Medòc, coma una hita. Nos consacram adara a la mèsa en plaça dau nòste repertòri e la trobada dau nòste son. Las nòstas purmèiras datas son previstas corrent 2019.

Objectiu
Pensam a performàncias « tot terrenh » includent malhums costumèirs mes tanben la carrèira, los luòcs desacostumats, a còps intimistes e los balètis de segur, moments privilegiats per partatjar la cultura occitana damb lo monde. Dens un segond temps vendràn enregistraments live o estudiò, audiò e videò.

Origina e encontre
Caròla es a l'origina dau projècte. "Dempui annadas, èi la volontat de crear un grop vocau de polifonia picada damb influéncias tradicionalas e actualas. Corrent 2017, Amandina, Jerèmias, Dalfina e jo-s’encontrèrem pendent estagis, concèrts, manifestacions culturalas occitanas, o balètis. Lèu, se trobèrem connectats d'un punt de vista uman e musicau. Lo plaser de cantar amassa adobèt las causas. Apassionats e bons vivents, nos agrada de nos amassar a l’entorn de moments hestius per partatjar lo nòste amor de la lenga occitana, dau bon minjar, dau rire e de la canta. Galip es la fruta d’aquest encontre. Es lo nòste biais de viure la lenga."

Lo grop
Caròla Gorg. Iniciatora dau projècte / Cantaira. 44 ans. Professora de las escòlas bilinguas françés/occitan. Percors : – etnomusicologia – guitarista/bassista/cantaira dens formacions diversas sus Bordèu – collectatges/balètis au CORDAE la Talvera pendent 5 ans – intervenenta canta/danças trads dempui 20 ans – membra de l'associacion ÒcBi.

Amandina Rameta. Cantaira / tustaira. 25 ans. Praticiana en Medecina Chinèsa a Tolosa. Tustaira autodidacta e dançaira dens balètis. Estudia la canta e las percussions ibericas. Anciana tustaira e cantaira dens lo grop « Puérile Sagesse » a Bordèu, estile « trad-rock ». Massaira oficiala dau CAMOM, Companha Guillaume Lopez e sus hestenaus occitans.

Jerèmias Obispo. Cantaire. 38 ans. Actuaument director adjunt de l'OPLO (Ofici public de la lenga occitana) a Bordèu. Co-fondator dau grop « Magicians d’Òc » (1999) – diferentas òbras a l’entorn de Feliç Castan e dau movement « Linha Imaginòt », organisacion de concèrts debuta de las annadas 2000, experiéncias dens l’ensenhament de l’occitan pui dentrada dens las institucions regionalas.

Dalfina Lafon. Cantaira. 41 ans. Comediana (que pravèt en tot escotar la meteò per Pèire Boissière e los contes de Maria-Odila Dumeaux…!) formada au Teatre dau Jorn (Agen), membre de la Companhia Zygomatic (Bressuire), de l’Ensemble UN & d’Impro Vox (Bordèu), tribalh de doblatge en occitan damb Conta’m, co-presidenta de la Calandreta de la Dauna (Peçac).

Lo nom
Galip es lo nom balhat a las ascladuras de husta qu’utilisam per alucar lo huc. Pertòca l’imaginari de la seuva de pins, l’efervescéncia de balètis atau com una beluga qui nos escauha e nos gavida dens aqueste projècte.

Galip es un grop de canta polifonica occitana d'origina Bordalesa. Per partatjar la cultura occitana damb lo monde Contacte
contact@galip.org